தமிழகத்தின் மிக மூத்த பதிப்பகங்களுள், மணிமேகலைப் பிரசுரம் முன்னிலை வகிக்கும் பதிப்பமாகும். 1955இல் தமிழகத்தின் புகழ்மிகு எழுத்தாளர் திரு.தமிழ்வாணன் அவர்களால் தம் எழுத்துகளை தாமே பதிப்பித்து வெளியிடுவதற்காக இப் பதிப்பகம் ஆரம்பிக்கப்பட்டது.

தமிழ்வாணன் தமது நூல்களை மட்டுமே வெளியிடும் நோக்கத்துடன் இதை ஆரம்பித்து, 26 வருடங்கள் இக் கொள்கையில் உறுதியாக இருந்தார். கணையாழி எனும் புகழ்மிக்க இதழ், தமிழ்வாணன் இயற்கை எய்தும் போது பின்வருமாறு எழுதியதே இப் பிரசுரத்தின் பெருமைக்கு நல்லதொரு நற்சான்று.

தமிழ்வாணன் தாம் எழுதிய நுால்களை, தாமே, தம்மால், தம் மனைவி பெயரால் ஆரம்பிக்கப்பட்ட மணிமேகலைப் பிரசுரத்தில் வெளியிட்டார். வெளியிட்டதுடன் தம் நுால்களை வெற்றிகரமாகவும் சந்தைப்படுத்தினார். தமிழக எழுத்தாளர்கள் பலரும் எழுதினர். பலரும் சுயமாக வெளியிட முன்வரவில்லை. முன்வந்த எழுத்தாளர் பலரும் தமிழ்வாணன் அளவிற்கு வெற்றிகரமாகச் சந்தைப்படுத்தியதாகத் தெரியவில்லை. இவ் வகையில் மணிமேகலைப் பிரசுரம், பிரசுரங்களுள் அரிய இரகத்தைச் சேர்ந்த ஒன்று எனத் தாராளமாகக் கூறலாம்.

மணிமேகலைப் பிரசுரம் தமிழ்வாணன் வாரிசுகளான திரு.லேனா தமிழ்வாணன், திரு.ரவி தமிழ்வாணன் ஆகியோரால் இன்றளவும் மிகவும் வெற்றிகரமாக நடத்தப்பட்டு வருகிறது

66வது ஆண்டில் காலடி பதிக்கும் இப் பிரசுரம் இன்று 4000 நுால்களை விற்பனையில் கொண்டுள்ள, தென்னகத்திலேயே அதிக நுால்களை வெளியிட்ட (இதுவரை 10,000 நூல்கள்) பிரசுரமாக கருதப்படுகிறது.

மாநில விருதுகளையும், பல இலக்கிய அமைப்புகளின் விருதுகளையும் அள்ளிக் குவித்துள்ள மணிமேகலைப் பிரசுரம், 5000 எழுத்தாளர்களைக் கொண்ட வலிமையான எழுத்துலக அடையாளமாகத் திகழ்வது கூடுதல் சிறப்பு.

1926-இல் தேவகோட்டை எனும் சிற்றூரில் பிறந்தவர். பள்ளிக் காலத்திலேயே "தமிழ் மணம்" என்கிற சிற்றிதழ் ஒன்றைக் கையேடாக நடத்தி, தம் எழுத்து துறை ஆர்வத்தை 16 வயதில் உலகிற்குப் புலப்படுத்தியவர்.

அலுவலகப் பையன், உதவி ஆசிரியர், துணை ஆசிரியர் என்று பொறுப்புகளில் மெல்ல உயர்ந்து 1946இல் அணில் எனும் சிறுவர் இதழுக்கு ஆசிரியராக ஆனார். பொருளாதாரச் சிரமங்களால் அணில் மூடப்பட்டதும், கல்கண்டு இதழ் குமுதம் நிறுவனர் ஆசிரியர் திரு.எஸ்.ஏ.பி அவர்களின் ஆதரவில் இரு ஆண்டுகளிலேயே குமுதத்தை மிஞ்சுமளவு விற்பனையை தொடங்கி உயர்த்தி, அந்தக் காலத்திலேயே 40,000 பிரதிகள் தொட்டவர். "கல்கண்டு அண்ணா" என்று எண்ணற்ற இளம் வாசகர்களால் அழைக்கப் பெற்று, தமிழ்ப் பத்திரிகை உலகில் ஒரு கதாநாயகன் போலவே வலம் வரத் தொடங்கினார்.

இவரது கதைத் தொடரான சங்கர்லால் வரிசைக்கு அமோக வரவேற்பு. தனித் தமிழ் நடையையும், தூய கதை மாந்தர் பெயர்களையும் பயன்படுத்தி, தமிழ் உணர்வை வாசகர்களிடையே வளர்த்த நாவலாசிரியர். படக் கதைகள், எழுதும் எழுத்தாளரே தமது படைப்பில் துப்பறிவாளராக ஆவது (உதாரணமாக தமிழ்வாணன் துப்பறியும் பிடி 22) தமிழ் இதழ்களில் முதன் முதலில் கேள்வி பதில் ஆரம்பித்தது, வாசகர்களைப் பத்திரிகை அலுவலகத்திற்கே வரவழைத்து தொடர்கதை ஆரம்பிப்பதை அறிவிக்கும் விழா எனப் பல புதுமைகளை அக் காலத்தில் புகுத்திய முன்னோடி.

மிகச் சிறந்த மேடைப் பேச்சாளர். அமர்ந்திருக்கும் சபையோரை விலா நோகச் சிரிக்க வைத்த நல்ல நகைச்சுவையாளர். தமிழக அரசியல் பிரபலங்களைத் துணிந்து விமரிசித்தவர். மக்கள் திலகம் என்று எம்.ஜி.ஆர் அவர்களுக்கு இப் பட்டத்தை வழங்கியவர். துணிவே துணைக் கொள்கையாளர். ஜோதிடம் பார்ப்பது: இயற்கை வைத்தியப் பொருள்களைத் தயாரித்து விற்பனை; திரைப்படத் தயாரிப்பு என்று பல்துறை ஆற்றலாளராக விளங்கி, எழுத்தும் வறுமையும் ஒட்டிப் பிறந்த இரட்டைக் குழந்தைகள் என்பதை உடைத்து, பெருஞ்செல்வம் ஈட்டிய பெருமகன்.

வாழ்வு முன்னேற்றச் சிந்தனைகளை பெருமளவில் எழுதி எண்ணற்ற இளைஞர்களின் வழிகாட்டியாகத் திகழ்ந்தவர். இவரது தன்னம்பிக்கைக் கட்டுரைகள் மற்றும் வாழ்வு முன்னேற்றச் சிந்தனைகளை விரும்பிப் படிக்க வைத்ததன் மூலம் ஒரு சிறந்த இளைய சமுதாயத்தை வழி நடத்திய அபூர்வ எழுத்தாளர்.

Master of All Subjects என்றும் புரட்சி எழுத்தாளர் என்றும் அங்கீகரிக்கப்பட்ட தமிழகத்தின் தனிப் பெரும் ஆளுமை அவர்.

எழுத்தாளர் தமிழ்வாணன் மூத்த புதல்வர், 1954இல் தேவகோட்டையில் பிறந்தவர். பள்ளி வாழ்வைத் தேவகோட்டையில் ஆரம்பித்து, இதன் தொடர்ச்சியை சென்னை ராமகிருஷ்ணா பள்ளியிலும், கல்லூாரி வாழ்க்கையைச் சென்னை பச்சையப்பனிலும் நிறைவு செய்தவர். எம்.ஏ.தமிழ் இலக்கியப் பட்டதாரி டெல்லிப் பல்கலையில் இதழியல் பட்டயப் படிப்புப் படித்தார்.

1971இல் பி.யு.சி. படிக்கும்போதே தந்தை தந்த ஊக்கத்தால் கல்கண்டு இதழில் எழுத ஆரம்பித்து, தந்தையின் மறைவிற்குப் பிறகு, கல்கண்டின் ஆசிரியராக ஆனவர் விரைவில் எழுத்துலகில் பொன்விழாக் காண இருக்கும் இவர், நல்ல பேச்சாளர் கூட.

தமிழகத்தின் முன்னணி நிறுவனங்களான ஹுண்டாய்; ஃபோர்டு, கேட்டர் பில்லர், டி.வி.எஸ் போன்றவற்றிற்குப் பயிற்சி வகுப்புகள் எடுக்கவல்ல முன்னணிப் பயிற்சியாளர்.

தமிழக இலக்கிய மேடைகளிலும், பல்வேறு சங்க மேடைகளிலும் மக்கள் மனம் களிக்கப் பேசி கூட்டத்தினரின் விருப்பமிகு ஆளுமையாக ஆகியிருப்பவர்.

92 நூல்களின் ஆசிரியர். 10,000 நூல்களைப் பதிப்பித்த பெருமைக்கு உரியவர். பதிப்பக உலகில் எந்தத் தனி மனிதனும் சாதித்திராத சாதனை இது.

நன்கு உலகம் சுற்றியவர், 20 பயணக் கட்டுரைகளை எழுதியுள்ள ஒரே தமிழ் எழுத்தாளர். தந்தையை அடியொற்றி வாழ்வு முன்னேற்றச் சிந்தனைகளைத் தொடர்ந்து எழுதி வரும் இவரது ஒரு பக்கக் கட்டுரைகள் (1750 கட்டுரைகள்) வாசகர்களால் பெரிதும் விரும்பப் பெற்றவை.

தொலைக்காட்சிப் பேச்சாளர். ஒரு தொலைக்காட்சி விடாமல் அனைத்துத் தமிழ்த் தொலைக்காட்சிகளிலும் தோன்றிப் பேசியும், பேட்டி அளித்தும் உள்ள இவர், நியூஸ் 7 தமிழ் தொலைக்காட்சியில் மட்டும் தீர்வுகள் என்ற தலைப்பில் தொடர்ந்து இரண்டரை ஆண்டுகள் பேசிய பெருமைக்கு உரியவர்.

தமிழக அரசின் உயரிய விருதான கலைமாமணி பட்டமும், அமெரிக்க உலகத் தமிழ்ப் பல்கலைக் கழகத்தால் முனைவர் பட்டமும், காஞ்சி மடத்தால் தமிழ் மாமணி பட்டமும், வேலூர் தமிழ் எழுத்தாளர் சங்கத்தால் எழுத்துச் செல்வர் பட்டமும் அளிக்கப் பெற்றுச் சிறப்பிக்கப்பட்டவர்.

புரட்சி எழுத்தாளர் திரு.தமிழ்வாணனின் இளைய மகன். 1956இல் பிறந்தவர். பி.காம் பட்டத்தை சென்னை லயோலாவில் பயின்று, ஆடிட்டர் ஆகும் எண்ணத்தில் C.A படித்தவர். இது, முழுமை பெற இயலாதபடி தந்தையின் மரணம் நிகழவே, தந்தையின் நிறுவனமான மணிமேகலைப் பிரசுர நிர்வாகத்தை ஏற்று அதன் நிர்வாக இயக்குநரானார்.

தந்தையிடம் பெற்ற தரமான பயிற்சி காரணமாக, நிர்வாக நுணுக்கங்களை நன்கு கற்று, தமது உழைப்பாலும் முயற்சியாலும் மணிமேகலைப் பிரசுரத்தைத் தமிழகத்தின் முன்னணிப் பதிப்பகங்களுள் ஒன்றாக வளர்த்துள்ள ஆற்றலாளர். உதாரணமாக தந்தையின் 83 நூல்கள் மற்றும் விற்பனையில் இருந்த நிலையை மேம்படுத்தி, அவரது 500 நூல்களுள் 496-ஐயும் பதிப்பிக்கப் பெருமுயற்சி எடுத்து வெற்றியும் பெற்றவர்.

தமது மூத்த சகோதரர் திரு.லேனா தமிழ்வாணன் துணையுடன், ஆசிரியர் குழுவை உருவாக்கி, எண்ணற்ற நூல்கள் வெளிக்கொணர்ந்தார். பிரசாத்தின் கதவுகளை நன்கு திறந்துவிட்டு, எண்ணற்ற எழுத்தாளர்கள் (5000 பேர்களை) இணைத்து 10000 நூல்கள் உருவாக அரும்பாடு பட்டார். இவ் வெற்றிப் பயணம் இன்றளவும் மலர்ந்து மணம் வீசுகிறது.

வெளிநாட்டுத் தமிழர்களிடம் நுால்களைக் கொண்டு சேர்க்கும் ஆவலில் உலகெங்கும் (ஜப்பான், ரஷ்யா உட்பட) 500க்கும் மேற்பட்ட புத்தகக் கண்காட்சிகளையும், நூல் வெளியீட்டு விழாக்களையும் நடத்தி, புது அணுகுமுறையைத் தமிழ்ப் பதிப்பகம் உலகில் புகுத்தி, வெற்றி கண்டுள்ளார்.

இதற்கென, உலக நாடுகள் பெரும்பாலானவற்றிற்கு எண்ணற்ற பயன்கள் மேற்கொண்டவர். இலங்கைக்கு மட்டும் 60 முறை, அமெரிக்காவிற்கு 20 முறை. "உலகெங்கும் தமிழ் பரப்பும் தமிழ்த் தூதர்" என்று நல்லி உரிமையாளர் திரு.குப்புசாமி செட்டியார் இவரை அங்கீகரித்துள்ளது குறிப்பிடத்தக்கது.

இவரது தமிழ்ப் பணிக்காக அமெரிக்க உலகத் தமிழ்ப் பல்கலைக் கழகம் இவருக்கு முனைவர் பட்டம் வழங்கிச் சிறப்பித்துள்ளது. உலகத் தமிழ்ப் பதிப்பாளர், ஐரோப்பிய ரத்னா; பதிப்பகம் செல்வர்; பதிப்பக புரவலர்; பதிப்புச் சுடர்; பதிப்பகம் பகலவன்; பதிப்புக் கலைமாமணி; பதிப்புச் செம்மல்; பதிப்புத் திலகம் என இவர் பெற்ற விருதுகளின் பட்டியல் நீளும்.