யாருடன் கூட்டணி? எப்போது தேர்தல்?:
நிருபர்களுடன் விஜயகாந்த் மோதல்

சென்னை: சென்னையில் 18ஆம் தேதி நடைபெறுவதாக உள்ள தே.மு.தி.க. இளைஞர் அணி மாநாட்டுக்கு இடையூறு ஏற்பட்டிருப்பதாக அக்கட்சியின் தலைவர் விஜயகாந்த் கூறினார்.

சென்னை கோயம்பேட்டில் தே.மு.தி.க. தலைமை அலுவலகத்தில் நேற்று முன்தினம் நிருபர்களைச் சந்தித்த விஜயகாந்த்,

தே.மு.தி.க. வின் 4 ஆண்டு தினம், அறிஞர் அண்ணா நூற்றாண்டு விழா ஆகியவற்றையொட்டி, அக்டோபர் 18ஆம் தேதி சென்னை தீவுத்திடலில் இளைஞர் அணி மாநாடு நடைபெறுவதாகவும், ஆளும்கட்சி்த் தரப்பில் இருந்து இடையூறு ஏற்பட்டுள்ளதாகத் தெரிவித்தார்.

கொடிக்கம்பம் கட்டுவதில் தொடங்கி சுவர் விளம்பரம், பஸ், வேன் பதிவு வரை தொல்லைகள் தொடர்வதாக அவர் கூறினார்.

ஆனால், எத்தனை இடையூறுகள் வந்தாலும் இந்த மாநாட்டை வெற்றிகரமாக நடத்திக்காட்டுவோம் என்றவர், இலங்கைத் தமிழர் பிரச்னையில் பிரதமருக்கு தந்தி அடிக்கச் சொல்வது கருணாநிதி போடும் அரசியல் நாடகம் என்றும், தொலைத்தொடர்புத் துறையில் அலைவரிசை ஒதுக்கீட்டில் நடந்துள்ள ஊழலுக்குப் பொறுப்பேற்று அமைச்சர் ராஜா பதவி விலகவேண்டும் என்றும், உச்ச நீதிமன்ற நீதிபதியைக் கொண்டு அந்த ஊழலை விசாரிக்கவேண்டும் என்றும், தே.மு.தி.க. சார்பில் 1 லட்சம் பேருக்கு வேலைவாய்ப்பு அளிக்கப்படும் என்று அறிவித்தமைக்கு நல்ல பலன் ஏற்பட்டிருப்பதாகவும், தமிழகம் முழுவதிலும் இருந்து விண்ணப்பங்கள் குவிந்து வருவதாகவும் அவர் குறிப்பிட்டார்.

பேட்டியை முடித்துக்கொண்டு கிளம்பிய விஜயகாந்தை நிருபர்கள் சூழ்ந்துகொண்டு, ‘யாருடன் கூட்டணி அமைப்பீர்கள்?’ என்று குடைந்தார்கள். அதற்கு அவர், ‘தேர்தல் தேதி அறிவிக்கப்பட்டதும் சொல்கிறேன்’ என்றார்.

நிருபர்கள் விடாமல், ‘மக்களுடன்தான் கூட்டணி. கட்சிகளுடன் இல்லை என்றீர்கள். இப்போது உங்கள் நிலைப்பாடு மாறுவதுபோல் இருக்கிறதே? என்று கேட்டனர். அதற்கு விஜயகாந்த் குறிப்பிட்ட நிருபரைப் பார்த்து, ‘நீங்கள் எந்தப் பத்திரிகையைச் சேர்ந்தவர் என்பது தெரியும். எப்படி கேள்வி கேட்பீர்கள் என்பதும் தெரியும். என் வாயில் இருந்து வார்த்தைகளை பிடுங்காதீர்கள்’ என்று பதிலளித்தார்.

அப்படியும் நிருபர்கள் விடாமல் கூட்டணி குறித்து கேட்டதற்கு, ‘அப்படியா?’ என்ற தோரணையில் பார்த்த விஜயகாந்த், ‘நீங்கள் தேர்தல் எப்போது வரும் என்று கூறுங்கள். நான் கூட்டணி பற்றி சொல்கிறேன்’ என்றார் விடாப்பிடியாக.

உடனே நிருபர்கள் ‘தேர்தல் வரும் போது வரும்’ என்றனர். அதைக் கேட்ட விஜயகாந்த், ‘அது வரும்போது நானும் சொல்கிறேன்’ என்றார். அப்பவும் நிருபர்கள் நகருவதாக தெரியவில்லை என்றதும் ‘மக்களுடன்தான் கூட்டணி’ என்று பிரச்னைக்கு முற்றுப்புள்ளி வைத்துவிட்டு புறப்பட்டார் விஜயகாந்த்.

மா‌ர்‌க்‌‌சிஸ்‌ட் வரதராஜனை பார்க்க அனுமதி மறுப்பு: 
அப்பல்லோ மரு‌த்துவமனை மீது விஜயகாந்த் புகார்

சென்னை: மரு‌த்துவமனை‌யி‌ல் ‌சி‌கி‌ச்சை பெ‌‌ற்று வரு‌ம் மா‌ர்‌க்‌‌சிஸ்‌ட் க‌ம்யூ‌னி‌ஸ்‌ட் க‌ட்‌சி‌யி‌ன் மா‌நில செயல‌ர் வரதராஜனை, ‌நி‌ர்வா‌கிகளுட‌ன் செ‌ன்று பா‌ர்‌க்க அனுமத‌ி மறுக்கப்பட்டதாக தே.மு.தி.க. தலைவர் விஜயகாந்த் கூ‌றியு‌ள்ளா‌ர்.

இது தொட‌ர்பாக அவ‌ர் வெளியிட்டுள்ள அறிக்கையில்,

‘மார்க்சிஸ்‌ட் கம்யூனிஸ்‌ட் கட்சியின் மாநில செயலர் என்.வரதராஜன் அப்பல்லோ மருத்துவமனையில் சேர்ந்து சிகிச்சை பெற்று வருகிறார். இன்று (நேற்று) காலை 11.30 மணியளவில் அவரை நான் பார்க்க அப்பல்லோ மருத்துவமனைக்கு சென்றேன்.

அவைத்தலைவர் பண்ருட்டி ராமசந்திரன், தலைமை நிலைய செயலர் பார்த்த சாரதி, தேர்தல் பிரிவு செயலர் கிருஷ்ணமூர்த்தி மற்றும் மத்திய சென்னை மாவட்ட நிர்வாகிகள் சிலர் என்னுடன் வந்தார்கள்.

அப்பல்லோ மருத்துவமனையின் வாசலிலேயே என்னுடன் வந்தவர்களை மருத்துவமனைக்கு உள்ளே செல்ல அனுமதிக்கவில்லை. வேண்டுமானால் என்னை மட்டும் அனுமதிப்பதாக மருத்துவமனை நிர்வாகம் அறிவித்தது. என்னுடன் வந்தவர்களை அனுமதிக்க முடியாது என்றும் மருத்துவமனை நிர்வாகம் தடுத்தது ஏன் என்று எனக்கு புரியவில்லை.

முதல்வர் கருணாநிதி பார்த்த செய்தி புகைப்படத்தோடு பத்திரிகையில் வந்துள்ளது. எனினும் நீண்ட நேரம் நான் வாதாடியும் கூட அனுமதி தரவில்லை. தமிழ்நாட்டில் இப்படி ஒரு விசித்திரமான மருத்துவமனை இருப்பது எனக்கு இப்பொழுதுதான் தெரிகிறது. ஓருவேளை இதிலும் அரசியல் புகுந்து விளையாடுகிறதோ என்று வேதனைப்படுகிறேன்.

மார்க்சிஸ்‌ட் கம்யூனிஸ்‌ட் கட்சியைச் சேர்ந்த பெரியவர் என்.வரதராஜன் விரைவில் குணம் அடைய எனது வாழ்த்துக்களை தெரிவித்துக் கொள்கிறேன்’ எ‌ன்று கூ‌றியு‌ள்ளா‌ர்.
 

அடுத்த ஆட்சி தே.மு.தி.க. தான்!: அடித்துச் சொல்கிறார் விஜயகாந்த்

மதுரை: அடுத்து தே.மு.தி.க. தான் ஆட்சி அமைக்கும் என்பதை அடித்துச் சொல்வேன். நான் நானாகத்தான் இருக்கிறேன். தெய்வமும், மக்களும் எனக்குத் துணையாக உள்ளனர். பல கட்சிகள் கூட்டணிக்காக வருகிறார்கள். தே.மு.தி.க. வின் வளர்ச்சியைப் பார்த்து வருகிறார்கள் என்று தே.மு.தி.க. தலைவர் விஜயகாந்த் கூறியுள்ளார்.

பல்வேறு கட்சிகளைச் சேர்ந்தவர்கள் தே.மு.தி.க. வில் இணையும் விழா, தேமுதிக மதுரை தலைமைக் கழக அலுவலக வளாகத்தில் நடந்தது.  அப்போதுவிஜயகாந்த் பேசுகையில்,

”தமிழகத்தில் ஜனநாயக ஆட்சி நடக்கிறது என்று முதல்வர் கூறுகிறார். ஆனால் மதுரையில் அவரது மகன் சர்வாதிகாரம் செய்து வருகிறார்.

முதல்வர் அவரா, அல்லது அவரது மகனா? மதுரையில் தனியாட்சி நடந்து வருகிறது. நேரு, படேல் உள்ளிட்டோர் பாடுபட்டு வாங்கிக் கொடுத்த சுதந்திரம் மதுரையில் இல்லை.

ஒரு திரைப்படத்தைத் திரையிடக் கூடாது என்று தியேட்டர் உரிமையாளர்களை மிரட்டுவது ஜனநாயகத்தின் குரல் வளையை நெரிப்பது போலாகும்.

காதலில் விழுந்தேன் படத்தை போடுகிறீர்களா, சரி போட்டுக் கொள்ளுங்கள், ஆனால் மவனே அடுத்தடுத்து டார்ச்சர் கொடுப்போம் என்று பயமுறுத்துகிறார்கள். இதைப் பார்த்து பயந்து போன தியேட்டர் உரிமையாளர்கள் எதற்கு வம்பு என்று படத்தை திரையிட தயங்குகின்றனர்.

எனது கல்யாண மண்டபத்தை இடித்து விட்டு பாலம் கட்டப் போவதாக கூறினார்கள். ஆனால் பாலம் கட்டுவதற்கான ஒரு நடைமுறையும் இதுவரை மேற்கொள்ளப்படவில்லை.

விஜயகாந்த் ஆட்சிக்கு வந்தால் என்ன செய்ய முடியும்? இது எல்லோருடைய கேள்வி. 5 முறை முதல்வராக இருந்த கருணாநிதியால் விலைவாசி குறையவில்லை.

தமிழக காங்கிரஸ் தலைவர் தங்கபாலு தமிழக அமைச்சரவையில் இடம் கேட்பேன் என்றால் புதுச்சேரியில் தி.மு.க. வுக்கு இடம் கேட்பேன் என்கிறார் கருணாநிதி.

ரேஷன் கடைகளில் 50 ரூபாய்க்கு மளிகைப் பொருட்களை தரப் போவதாக கூறுகிறார்கள். நான் அதற்கு முன்பே ரேஷன் பொருட்களை பாக்கெட்டில் போட்டு வீட்டுக்கே தருவோம் என்றேன்.

50 ரூபாய் மளிகைப் பொருட்களை வாங்கினால்தான் ஒரு ரூபாய் அரிசியைத் தருகிறார்கள். அப்படியானால் ஒரு கிலோ அரிசி விலை 51 ரூபாயா?

எல்லாத் துறைகளிலும் லஞ்சம் தலைவிரித்தாடுகிறது. தமிழகத்தில் அரசு பஸ் விபத்துக்கள் அதிகம். காரணம், டிரைவிங் தெரியாமலேயே பலர் லஞ்சம் கொடுத்து டிரைவர் வேலை வாங்குகிறார்கள்.

நான் தேர்தலில் வெற்றி பெற்றால் பசு மாடு தருவேன் என்றேன். இலவசமாக அல்ல, பாலை விற்று அதை வைத்து பணத்தைக் கட்டுங்கள் என்கிறேன். பெண் குழந்தை பிறந்தால் 10 ஆயிரம் ரூபாய், அந்தக் குழந்தையின் பெயரில் வங்கியில் டெபாசிட் செய்வேன் என்றேன். அந்தக் குழந்தையின் திருமணத்தின்போது 1 லட்சம் ரூபாய் கிடைக்கும் என்பதால்தான் அப்படிச் சொன்னேன்.

அடுத்து தே.மு.தி.க. தான் ஆட்சி அமைக்கும் என்பதை அடித்துச் சொல்வேன். நான் நானாகத்தான் இருக்கிறேன். தெய்வமும், மக்களும் எனக்குத் துணையாக உள்ளனர். பல கட்சிகள் கூட்டணிக்காக வருகிறார்கள். தே.மு.தி.க. வின் வளர்ச்சியைப் பார்த்து வருகிறார்கள்.

தே.மு.தி.க. தொடங்கி 4 ஆண்டுகளிலேயே 20 சதவீத ஓட்டுக்கள் கிடைக்கும் என்று கருத்துக் கணிப்பு கூறியதைப் பார்த்து பலருக்கும் வயிற்றில் புளியைக் கரைக்கிறது.

தே.மு.தி.க. சொன்ன தேர்தல் அறிக்கையைத்தான் தற்போது தி.மு.க. அரசு நிறைவேற்றி வருகிறது. இன்று கட்சியில் சேர்ந்துள்ள 5 ஆயிரம் பேரும், 50 ஆயிரம் ஓட்டுக்களாக மாற்றித் தர வேண்டும்” என்று பேசினார்.

நடிக‌ர் வடிவேலு மீதான அடிதடி வழக்கு:
விரைந்து முடிக்க விஜயகாந்த் மேலாள‌ர் மனு
 
சென்னை: நடிக‌ர் வடிவேலு, தே.மு.‌தி.க. தொ‌‌ண்ட‌ர்க‌ள் மோ‌தி‌க் கொ‌ண்ட வழ‌க்‌கி‌ல், கட‌ந்த ஓரா‌ண்டா‌கியு‌ம் காவ‌ல்துறை‌யின‌ர் எ‌ந்த‌வித நடவடி‌க்கையு‌ம் எடு‌க்க‌வி‌ல்லை எ‌ன்று‌ம் இ‌ந்த வழ‌க்கை ‌விரை‌ந்து ‌விசா‌ரி‌த்து அ‌றி‌க்கை தா‌க்க‌ல் செ‌ய்யுமாறு கா‌வ‌ல்துறை‌யினரு‌க்கு உ‌த்தர‌விட வே‌ண்டு‌ம் எ‌‌ன்று‌ம் ‌விஜயகா‌ந்‌தி‌ன் மேலாள‌ர், செ‌ன்னை உய‌ர் ‌நீ‌திம‌ன்ற‌த்த‌ி‌ல் மனு‌த் தா‌க்க‌ல் செ‌ய்து‌ள்ளா‌ர்.

தே.மு.தி.க. தலைவர் விஜயகாந்த் மேலாள‌ர் சதீஷ்குமார், செ‌ன்னை உய‌ர் ‌நீ‌திம‌ன்ற‌த்த‌ி‌ல் தாக்கல் செய்துள்ள மனுவில்,

‘விஜயகாந்தின் உறவினரும், முன்னாள் அரசு வழ‌க்க‌றிஞருமான முத்துராம் கடந்த 13.9.2007 அன்று மரணம் அடைந்தார். அப்போது தே.மு.தி.க. தொண்டர்கள் சாலி கிராமத்தில் உள்ள அவரது வீட்டில் அதிக அளவில் கூடினார்கள்.

அதே தெருவில் குடியிருக்கும் நடிகர் வடிவேலு அந்த வழியாக வந்தார். குடிபோதையில் வந்த அவருக்கும், எங்களுக்கும் தகராறு ஏற்பட்டது. 20 பேருடன் வந்த அவர் என்னையும், தே.மு.தி.க. தொண்டர்கள் சிலரையும் தாக்கினார்கள். இது தொடர்பாக நான் கொடுத்த புகாரில் வடிவேலு மீது வழ‌க்கு‌ப் பதிவு செய்யப்பட்டது.

ஆனால் கடந்த ஓரா‌ண்டா‌கியு‌ம் எந்த நடவடிக்கையும் எடுக்கவில்லை. எனவே வடிவேலு மீதான வழக்கை விரைந்து விசாரித்து அறிக்கை தாக்கல் செய்யுமாறு காவ‌‌ல்துறை‌யினரு‌க்கு உத்தர விடவேண்டும்’ எ‌ன்று மனுவில் கூறியுள்ளார்.

இ‌ந்த மனு செ‌ப்ட‌ம்ப‌ர் 29ஆ‌ம் தே‌தி விசாரணைக்கு வருகிறது. 
 

வடிவேலுவையே சிரிக்க வைக்கும் நகைச்சுவை நடிகர் விஜயகாந்த் : வாகை சந்திரசேகர்

சென்னை: வடிவேலுவையே சிரிக்க வைக்கும் நகைச்சுவை நடிகராக விஜயகாந்த் உள்ளார் என்று நக்கல் அடித்திருக்கிறார் தி.மு.க. வைச் சேர்ந்த நடிகர் வாகை சந்திரசேகர்.

இதுதொடர்பாக அவர் வெளியிட்ட அறிக்கை ஒன்றில்,

‘உலகம் எனும் பூமிப்பந்தில் ஓரறிவு முதல் ஆறு அறிவு வரை உயிரினங்கள் வாழ்வதற்கு முழு முதற்காரணம் வெப்பம் - சூடு, அதைத் தருவது சூரியன். அதன் மகத்தான சக்தி இந்த பிரபஞ்சத்தையே ஆட்கொண்டு இயங்கிக் கொண்டிருக்கிறது. அது நல்லவன் கெட்டவன் பார்க்காது வேண்டியவன் வேண்டாதவன் பார்க்காது.

அதைப்போல முதல்வர் கருணாநிதி இந்தத் தமிழ்ச் சமுதாயத்திற்கு தன் வாழ்வையே அர்ப்பணித்து உழைத்துக் கொண்டிருப்பவர். மனித சூரியனாய் வாழ்ந்து கொண்டிருப்பவர்.

நடிகர் வடிவேலு வீடும் அலுவலகமும் தாக்கப்பட்டதற்குக் காரணம், தே.மு.தி.க. தலைவர் விஜயகாந்த் மீதும், அவருடைய கட்சியினர் மீதும் குற்றம் சாட்டியுள்ளார். அதற்கு விஜயகாந்த், ஆளும் கட்சியின் தூண்டுதல்தான் காரணம் என்று சூரியனைப் பார்த்து கர்ஜிக்கிறார். இவருடைய அறிக்கை இவருடைய பொதுவாழ்க்கை போராட்டத்திற்கு, இவரது மகுடத்தில் பதிக்கப்பட்ட மற்றொரு கூழாங்கல் என்பதை மகிழ்வுடன் அறிவிக்கிறேன்.

தமிழக மக்களையெல்லாம் கவலையை மறந்து சிரிக்க வைக்கும் ஆற்றல் பெற்ற நடிகர் வடிவேலுவையே சிரிக்க வைக்கும் நகைச்சுவை நடிகராய் விளங்கும் விஜயகாந்தை மக்கள் ஏற இறங்க பார்க்கிறார்கள்.

நண்பா உன் கோமாளிக் கூத்தைப் பார்த்து மக்கள் வடிவேலுவின் திரைப்பட பாணியில் என்ன சொல்கிறார்கள் தெரியுமா?

”ஸ்ஸ்… அப்பா… இப்பவே கண்ணைக் கட்டுதே!’ மற்றொரு வசனம்… ‘விஜயகாந்திற்கு நாகரிகம், பண்பு இதெல்லாம் வருமா வராதா?’ என்று.
 
முதல்வர் கருணாநிதி பெயரைச் சொல்ல உங்களுக்குத் தகுதி இருக்கிறதா என்பதையும், வடிவேலுவின் பாணியிலேயே சொல்கிறேன். ”ரூம் போட்டு யோசி” என்று கூறியுள்ளார்.

‘பஞ்ச்’ பாலு

தயவுசெய்து முதலில் பின்குறிப்பைப் படித்து விடவும்.

பின் குறிப்பு: கண்டிஷன்ஸ் அப்ளை மாதிரி இது என்னடா பின்குறிப்புன்னு பார்க்கறீங்களா. வழக்கமான மேட்டர்தான்.
பஞ்ச் பாலு அடிக்கும் கமெண்டுகள் சும்மா தமாசுக்குத்தான். யார் மனதையும் புண்படுத்தும் வகையில் எழுதப்படுவதில்லை.
சும்மா படிச்சுட்டு, ஆங்… அப்படியான்னு ரொம்ப ஈசியா எடுத்துக்கிட்டு போயிடனும். ஓ.கே?
…………………..

கடந்த ஆண்டு அண்ணா பிறந்த நாளில் கருணாநிதி தொடங்கிய டிவிக்கு கலைஞர் டிவி என்று பெயர் வைத்துக் கொண்டார். ஏன் அண்ணாவின் பெயரை வைக்கவில்லை? குறைந்தபட்சம் இசையருவி டிவிக்காவது அண்ணாவின் பெயரை வைத்திருக்கலாமே.
-ராமராஜன்
இதே கேள்வியை எம்.ஜி.ஆர். என்று மாற்றி அம்மாகிட்ட கேட்க தில்லு இருக்கா உங்களுக்கு?

இந்தியாவில் உள்ள மாநகரங்களுக்குத் தீவிரவாதிகளின் மிரட்டல் உள்ளது. அந்த வகையில் சென்னை நகரமும் தீவிரவாதிகளின் பட்டியலில் உள்ளது.
- தமிழக டி.ஜி.பி., கே.பி. ஜெயின்
அதுதான் மக்களுக்கே தெரியுமே. தீவிரவாதிகளை எப்படி ஒடுக்கப்போறீங்க, மக்களை எப்படி காப்பாற்ற போகிறீர்கள் என்பதைச் சொல்லுங்கள்.

கருணாநிதியின் தூண்டுதலின் பேரிலேயே வடிவேலு என்மீது  குற்றம் சாட்டுகிறார். வடிவேலு என்னை எதிர்த்து தேர்தலில் நிற்பேன் என்கிறார். கருணாநிதியே என்னை எதிர்த்துப் போட்டியிட்டாலும் நான் பயப்பட மாட்டேன். கலைஞர் மீதியிருந்த மரியாதையே போய்விட்டது. இனி அவரை கருணாநிதி என்றுதான் அழைக்கப் போகிறேன்.
நீங்க எப்படி அழைத்தாலும் அவர் உங்களைக் கண்டுகொள்ளப் போவதில்லை. அப்படியிருக்க, எதிர்ப்பு அரசியல் செய்ய வேண்டி, கண்டுக்கவே கண்டுக்காதவர்களைப் பார்த்து கர்ஜிப்பது பலவீனமாகத் தெரிகிறதே. அப்புறம்… எது கேட்டாலும் பயப்படமாட்டேன் என்று பதில் சொல்வது, உங்களைப் பார்த்து எல்லோரும் பயப்படுகிறார்கள் என்கிற நினைப்பில்தானே? இருந்தாலும் உங்களுக்கு இவ்வளவு தன்னம்பிக்கை கூடாதுங்க. இப்பவே முதல்வர் மாதிரி பேசற உங்களை விட பழையவர்களே மேல் என்று மக்கள் நினைக்க ஆரம்பித்துவிட்டது உங்க காதுல விழுந்ததா?

தமிழகத்தில் மின்தட்டுப்பாடு நீடிக்கிறது. மக்களின் பிரச்னைகளைத் தீர்ப்பதற்கோ, மாற்று நடவடிக்கை எடுப்பதற்கோ தமிழக அரசு உருப்படியாக எதுவும் செய்யவில்லை.
- இந்திய. கம்யூ., மாநிலச் செயலர் தா. பாண்டியன்
கூட இருந்தாலும் திட்டுறீங்க. இல்லாவிட்டாலும் திட்டுறீங்க. மக்கள் நண்பனாக நடிக்கத்தான் எவ்வளவு கஷ்டப்பட வேண்டியிருக்கிறது? பேசாம இ. கம்யூனிஸ்ட் என்பதை தி.(திட்டற) கம்யூனிஸ்ட்ன்னு மாத்திடுங்கன்னு தி.மு.க. உறுப்பினர்கள் புலம்புவது கேட்கிறதா?

காமெடியனை ஹீரோவாக்கிட்டாரு விஜயகாந்த். நானா அவரா பார்த்துருவோம். கட்சி ஆரம்பிக்கிறேனோ இல்லையோ… அவர் தேர்தலில் எங்கே போட்டியிட்டாலும் அவருக்கு நான்தான் சரியான போட்டி. பார்த்துப்புடுவோம். மக்கள் செல்வாக்கு யாருக்கு இருக்குன்னு பார்த்துப்புடுவோம்.
-வடிவேலு
நல்லா ஜோக் அடிச்சீங்க போங்க! சின்னக்கவுண்டரில் குடை பிடித்ததை மறந்துவிட்டு பேசக் கூடாது. கைப்புள்ளக் கணக்கா கவிழ்ந்திடாம பார்த்துக்கணும். நாய் சேகர் வழியில் நாக்கு  மட்டும் பேசாம பார்த்துக்கணும். அப்பதான் அரசியல் களம் சூடா இருக்கும். என்னாங்கிறீங்க?