தமிழனத்தை காக்க தலைமை ஏற்றால் கருணாநிதிக்கு துணை நிற்போம்: ராமதாஸ்

சென்னை: தமிழினத்தை காக்க முதல்வர் கருணாநிதி தலைமை ஏற்றால், அவருக்கு தமிழகமே துணை நிற்கும் என்று பா.ம.க. நிறுவனர் டாக்டர் ராமதாஸ் கூறியுள்ளார்.

இதுதொடர்பாக அவர் வெளியிட்டுள்ள அறிக்கையில்,

‘இலங்கையில் செத்து மடிந்து கொண்டிருக்கும் தமிழர்களை காப்பாற்றுகின்ற ஒரு விஷயத்திலாவது இங்குள்ள தமிழர்கள் ஒன்றுபட்டிருப்போம். நமக்குள்ளே சச்சரவுகள் தேவையில்லை. எல்லோரும் ஒன்றுபட்ட நிலையில் இலங்கைத் தமிழர் பிரச்னையை அணுகுவோம் என்று முதல்வர் கருணாநிதி விடுத்துள்ள வேண்டுகோளை முழுமனதோடு வரவேற்கிறேன்.

முதல்வரின் இந்த வேண்டுகோள் பேச்சளவில் நின்றுவிடக் கூடாது. முன் எப்போதும் இல்லாத அளவுக்கு இந்த பிரச்னையில் நமக்குள் ஒற்றுமை ஏற்பட்டுள்ளது.

இலங்கைத் தமிழர்களை காக்கும் பிரச்னையில் இப்போது தமிழகத்தில் ஒற்றுமையை வலுப்படுத்துகின்ற வகையில் ஒருமித்த கருத்துடைய அனைத்து அரசியல் இயக்கங்களையும் ஓரணியில் திரட்டி இலங்கை மண்ணில் தமிழினத்தை ஒழித்துக்கட்டியே தீருவேன் என்று கங்கணம் கட்டிக் கொண்டு மூர்க்கத்தனமாக போரிட்டு வரும் சிங்கள இனவெறி அரசுக்கு பாடம் புகட்டுவதற்கான நடவடிக்கைகளை வகுத்து செயல்பட முதல்வர் முன் வர வேண்டும்.

தமிழர்கள் எங்கு செத்தாலும் அவர்களும் தமிழர்கள்தான். அந்த தமிழர்களை காப்பாற்றுகின்ற பொறுப்பு தமிழக முதல்வருக்கும் அவர் தலைமையிலான அரசுக்கும் இருக்கிறது. முதல்வர் கருணாநிதி அந்த பொறுப்பை உணர்ந்து கடமையாற்ற முன்வந்திருக்கிறார் என்பதை அவரது பேச்சு வெளிப்படுத்துகிறது. அதற்காக அவரை மனதார பாராட்டுகிறேன்.

இந்த பிரச்னையில் அதிகாரிகள் மட்டத்தில் பேசி பயனில்லை. பிரதமரே நேரடியாக இலங்கை அதிபரை தொடர்பு கொண்டு இந்தியாவின் கண்டனத்தை தெரிவிக்க வேண்டும் என்று வலியுறுத்த வேண்டும்.

தமிழர்கள் வாழும் வடக்கு மற்றும் கிழக்கு பகுதிகளில் ராணுவம் நடத்தும் அட்டூழியங்களையும் அத்துமீறல்களையும் நேரில் அறிந்து வர இங்கிருந்து நாடாளுமன்ற குழுவை அனுப்ப வேண்டும். தேசிய கட்சிகளின் நாடாளுமன்ற பிரதிநிதிகள் அதில் இடம் பெற வேண்டும்.

தமிழர்களின் நிலையை அவர்கள் அறிந்து வர வேண்டும். அவர்கள் கொடுக்கும் அறிக்கையின்படி மத்திய அரசு மனிதாபிமான உதவிகளை செய்ய வற்புறுத்த வேண்டும்.

தமிழனத்தை காக்கும் பணியில் முதல்வர் என்ற முறையில் கருணாநிதி தலைமை ஏற்க முன் வர வேண்டும். இதில் தமிழகமே அவருக்கு துணை நிற்கும்’ என்று கூறியுள்ளார்.

தமிழரைக் காக்க பிரதமரை கருணாநிதி நேரில் சந்திக்க வேண்டும்: ராமதாஸ்

சென்னை: தமிழர்கள் மீதான இலங்கை ராணுவத்தின் தாக்குதலை தடுத்து நிறுத்தக் கோரி பிரதமரை நேரில் சந்தித்து முதல்வர் கருணாநிதி முறையிட வேண்டும் என ராமதாஸ் கூறியுள்ளார்.

இதுகுறித்து  பா.ம.க. நிறுவனர் மருத்துவர் ராமதாஸ் வெளியிட்டுள்ள அறிக்கையில்,

‘இலங்கையில் நாளுக்கு நாள் நிலைமை மோசமாகி வருகிறது. தமிழர்கள் பகுதிகள் மீது இலங்கை ராணுவம் காட்டுமிராண்டித்தனமாக தாக்குதல் நடத்தி வருகிறது. அப்பாவி தமிழர்களை தினமும் கொன்று குவித்துக் கொண்டிருக்கிறது.

லட்சக்கணக்கான தமிழ் மக்கள் அவர்களது சொந்த நாட்டிலேயே அகதிகளாக உயிருக்கு எந்தவித உத்தரவாதமுமின்றி முகாம்களில் தஞ்சம் புகுந்துள்ளனர். சொந்த வீடுகளை இழந்து, இடம் பெயர்ந்துள்ள இவர்கள் உண்ண உணவின்றியும், மருந்துகள் இன்றியும் வாடிக் கொண்டுள்ளனர்.

ஹிட்லர் நடத்திய இனப்படுகொலையை விடவும் மோசமான படுகொலையை ராஜபக்சே நடத்திக் கொண்டிருக்கிறார். தமிழ் இனத்தையே பூண்டோடு அழிக்கும் சபதத்தை துணிந்து நிறைவேற்றிக் கொண்டிருக்கிறார். மனித உரிமைகளை காலில் போட்டு மிதித்துக் கொண்டிருக்கிறார். இத்தனை கொடுமைகளுக்குப் பிறகும் இந்திய அரசு வாய் திறக்கவில்லை. தமிழர்களுக்கு ஆதரவாக குரல் கொடுக்கவில்லை.

இலங்கை தமிழர்களைக் காக்க நடவடிக்கை மேற்கொள்ள வேண்டும் என்று வலியுறுத்த வேண்டிய தமிழக அரசும் அந்தக் கடமையை செய்யவில்லை என்று உலக தமிழர்களெல்லாம் வேதனையோடு மூழ்கி நிற்கின்றனர். அவர்களது வேதனையில் நியாயம் இல்லாமல் இல்லை.

பிரதமருக்கு லட்சக்கணக்கில் தந்திகளை அனுப்பி வையுங்கள் என்று முதல்வர் கூறியுள்ளார். அது வரவேற்கத்தக்க கோரிக்கைதான். ஆனால் இவை மட்டும் போதாது, சட்டப்பேரவையில் தீர்மானம் நிறைவேற்றி விடுத்த வேண்டுகோளுக்குப் பிறகும், இந்திய அரசு இதுதொடர்பாக எந்த நடவடிக்கையும் எடுக்கவில்லை.

இலங்கையில், இப்போது போர் நடவடிக்கைகளும், போர்ப்படையினரின் தாக்குதல்களும் தீவிரமாகி இருப்பதும் அமைதிக்கான பேச்சுவார்த்தைகளை தொடங்குவதற்கான அறிகுறியே இல்லாததும், இலங்கைத் தமிழர் பிரச்னையில் சட்டப்பேரவையும், தமிழக மக்களும் விரும்பிய நடவடிக்கையை இந்திய அரசு மேற்கொள்ளவில்லை என்பது தெளிவாகத் தெரிகிறது.

இத்தகைய சூழ்நிலையில் எங்கோ ஒரு மூலையில் பொதுக்கூட்டம் நடத்தி, நிலைமையை விளக்குவதாலும், தந்திகள் அனுப்பிக் கொண்டிருப்பதாலும் நாம் விரும்புகின்ற பயன் ஏற்படப் போவதில்லை.

முதல்வரும், அவரது தலைமையிலான அரசும் பிரதமரிடமும், வெளியுறவுத்துறை அமைச்சரிடமும் நேரடியாக தொடர்பு கொண்டு பேச வேண்டும். இலங்கைத் தமிழர் பிரச்சினையில் இந்திய அரசு உடனடியாக தலையிட்டு இலங்கை அரசை வற்புறுத்த வேண்டும்.

இலங்கைத் தமிழர் பிரச்னையில், கடந்த சில ஆண்டுகளாக இல்லாத ஒற்றுமை இப்போது தமிழக அரசியல் களத்தில் உருவாகியிருக்கிறது. இந்த நல்ல சூழ்நிலையை முதல்வர் பயன்படுத்திக் கொள்ள முன்வர வேண்டும். அமைதி பேச்சுவார்த்தை உடனடியாக தொடங்கப்பட வேண்டும். தமிழர்களைக் கொன்று குவித்து வரும் சிங்களப் போர்ப்படையினருக்கு எந்தவித உதவியும் வழங்கக் கூடாது’ என்று கூறியுள்ளார்.

27 சதவிகித இடஒதுக்கீடு சமூகரீதியில் அமையவேண்டும்: ராமதாஸ் கோரிக்கை

சென்னை: இட ஒதுக்கீடு சலுகை என்பது சமூகரீதியில் வழங்கப்பட வேண்டுமே தவிர, பொருளாதாரரீதியில் வழங்கப்படக் கூடாது என்று  ராமதாஸ் ‌‌கூறியுள்ளார். 

இது குறித்து பாட்டாளி மக்கள் கட்சி ‌நிறுவன‌ர் ராமதாஸ் வெளியிட்டுள்ள அறிக்கையில்,

‘வேலைவாய்ப்பு, கல்வியில் இடஒதுக்கீடு சலுகையைப் பெற்றிட இதர பிற்படுத்தப்பட்டவர்களுக்கான வருமான உச்சவரம்பு ரூ. 2.50 லட்ச‌த்‌தி‌லிருந்து ரூ.4.50 லட்சமாக உயர்த்திட மத்திய அரசு முடிவெடுத்திருக்கிறது. இடஒதுக்கீடு சலுகை என்பது சமூகரீதியில் வழங்கப்பட வேண்டுமே தவிர, பொருளாதாரரீதியில் வழங்கப்படக்கூடாது என்ற நிலைப்பாட்டில் பாட்டாளி மக்கள் கட்சி உறுதியாக இருக்கிறது.

எனவே, தற்காலிக ஏற்பாடாக வருமான உச்சவரம்பை உயர்த்தியுள்ளதை வரவேற்கின்ற அதே நேரத்தில் அடுத்தகட்டமாக வருமான உச்சவரம்பை முற்றிலுமாக நீக்கிட வேண்டும் என்று பாட்டாளி மக்கள் கட்சியின் சார்பில் வற்புறுத்துகிறேன். இதற்காக தொடர்ந்து நாங்கள் போராடவும் தயங்கமாட்டோம்.

ஐ.ஐ.டி., ஐ.ஐ.எம். மற்றும் மத்திய அரசுக்கு சொந்தமான பல்கலைக்கழகங்களில் இதர பிற்படுத்தப்பட்ட மாணவர்களுக்கு 27 ‌சதவிகிதம் இடஒதுக்கீடு வழங்கும் திட்டத்தில் இந்த ஆண்டு முதல்படியாக மிகக் குறைந்த அளவிலான இடங்களே ஒதுக்கப்பட்டிருக்கின்றன.

பிற்படுத்தப்பட்டவர்களில் வசதி படைத்தவர்களுக்கு இடஒதுக்கீடு சலுகை இல்லை என பெரும்பாலானவர்களை ஒதுக்கி வைத்துவிட்டதால், இந்த குறைந்த அளவிலான இடங்களைக் கூட நிரப்புவதற்கு தேவையான அளவுக்கு போட்டியாளர்கள் கிடைக்கவில்லை என்று சொல்லி 400-க்கும் மேற்பட்ட இடங்களை பொதுப்பட்டியலுக்கு மாற்ற இருக்கும் ஆபத்தை மத்திய அரசு இப்போது மேற்கொண்டுள்ள இந்த முடிவு தடுத்து நிறுத்தும் என்பதில் சந்தேகம் இல்லை.

ஆனால், இதுவே நிரந்தர பரிகாரமாக இருந்துவிட முடியாது. இனி அடுத்து வரும் ஆண்டுகளில் 27 ‌சதவிகிதம் அளவிற்கான இடங்களை முழுமையாக நிரப்புவதற்கான முயற்சிகள் மேற்கொள்ளப்படும்போது, தேவையான அளவுக்கு போட்டியாளர்கள் கிடைக்கவில்லை என்ற காரணத்திற்காக பெரும்பாலான இடங்கள் பொதுப்பட்டியலுக்கு மாற்றப்படும் ஆபத்து இருந்து கொண்டுதான் இருக்கும்.

எனவே, உயர்கல்வியில் பிற்படுத்தப்பட்டோர் இடஒதுக்கீட்டிற்கு கொல்லைப்புறமாக வர இருக்கும் ஆபத்தை நிரந்தரமாக தடுக்க வேண்டுமானால், பிற்படுத்தப்பட்டோரில் வசதி படைத்தோர் என்ற தடையை முற்றிலுமாக தகர்த்தெறிய வேண்டும். வருமான வரம்பு இல்லாமல் பிற்படுத்தப்பட்டோர் சலுகையை கல்வி மற்றும் வேலைவாய்ப்பில் செயல்படுத்த வேண்டும்.

இடஒதுக்கீட்டின் தாயகம் என்று அழைக்கப்படும் தமிழகத்திலிருந்து இதற்கான முயற்சி தொடங்கப்பட வேண்டும். சமூகநீதியில் நம்பிக்கையுடைய அனைத்து அரசியல் இயக்கங்களும் இதற்காக குரல் கொடுக்க முன்வரவேண்டும்’ எ‌ன்று கூறியுள்ளார்.
 
 

‘பஞ்ச்’ பாலு

தயவுசெய்து முதலில் பின்குறிப்பைப் படித்து விடவும்.

பஞ்ச் டயலாக் விடும் பெருந்தலைகளுக்கே பஞ்ச் விடுவது தான் பஞ்ச் பாலுவின் பாலிசி!

அவரு எவ்வளவு பவரு உள்ளவரா இருந்தாலும் பஞ்ச் பாலுக்கிட்ட மாட்டினா பஞ்சு, பஞ்சா பறக்க வேண்டியதுதான்.

பின் குறிப்பு: கண்டிஷன்ஸ் அப்ளை மாதிரி இது என்னடா பின்குறிப்புன்னு பார்க்கறீங்களா. வழக்கமான மேட்டர்தான்.
பஞ்ச் பாலு அடிக்கும் கமெண்டுகள் சும்மா தமாசுக்குத்தான். யார் மனதையும் புண்படுத்தும் வகையில் எழுதப்படுவதில்லை.
சும்மா படிச்சுட்டு, ஆங்… அப்படியான்னு ரொம்ப ஈசியா எடுத்துக்கிட்டு போயிடனும். ஓ.கே?
…………………..

வீரத்தின் விளைநிலமான கம்யூனிஸ்ட்டுகளின் கால்கள் நான்கைந்து ஸீட்டுகளுக்காக விஜயகாந்தின் வீட்டு வாசலை மிதிக்கலாமா? -அமைச்சர் துரைமுருகன்.
சுயநலமாக செயல்படுவதும், சந்தர்ப்பவாத அரசியல் நடத்துவதும் உங்களுக்கு மட்டுமேயான சொத்தா என்ன? அவர்களும் தான் கொஞ்சம் அனுபவிக்கட்டுமே! 

தமிழகத்தில் மந்தரி ஆகும் கனவு தகர்ந்துவிட்டதே என்ற கேள்விக்கு….

”கனவு தகர்ந்துவிட்டது என்று கூற முடியாது. விருப்பம் நிறைவேறவில்லை என்று வேண்டுமானால் கூறலாம். காங்கிரஸ் கனவு என்பது எங்கள் தலைமையில் அரசு அமைவதுதான். அதில் நாங்கள் தீவிரமாக உள்ளோம்.”
- பீட்டர் அல்போன்ஸ் பதில்
தூங்குவதிலா தீவிரம்? அரசு அமைப்பது கனவுதான் என்றால், 40 ஆண்டுகளாக தமிழக காங்கிரஸ் தூங்கிக்கொண்டு தான் இருக்கிறது என்பதை ஒப்புக் கொள்கிறீர்களா? எப்போது விழிப்பீர்கள்?

தமிழக ஆட்சி அதிகாரத்தில் பங்கு கேட்க காங்கிரஸ் கட்சிக்கு முழு அதிகாரம் இருக்கிறது. தி.மு.க. ஆட்சியைத் தாங்கிப் பிடித்திருக்கும் ஒரே கட்சி காங்கிரஸ். தனிமரமாக நின்று காங்கிரஸ் மட்டும் தி.மு.க ஆட்சியைக் காப்பாற்றிக் கொண்டு இருக்கிறது. அப்படிப்பட்ட காங்கிரஸை கலைஞர் மதிக்கவில்லை.
- பா.ம.க. நிறுவனர் ராமதாஸ் பேட்டி
இதைத் தட்டிகேட்க காங்கிரஸ்காரர்களுக்கே தில்லு இல்னேன்னும்போது நீங்களாச்சும் கேட்டீங்களே… சந்தோஷம். ஆமாம் நீங்கள் எப்போது காங்கிரசின் கொ.ப.செ. ஆனீர்கள்? மது ஒழிப்பு, தமிழ் வளர்ச்சி எல்லாம் போரடித்துவிட்டதா? தி.மு.க., காங்கிரஸ் இடையே  பற்றிக்கொண்டால், அதில் குளிர் காயலாம் என்பதுதானே தங்கள் எண்ணம்?

மனம், கடவுள் இரண்டும் மிகவும் ஒத்திருக்கும் இரண்டு விஷயங்கள். மனம் எங்கு இருக்கிறது என்பதும் தெரியாது. கடவுள் எங்கு இருக்கிறார் என்பதும் தெரியாது. விலாசம் இல்லாதவர்களெல்லாம் நெருக்கமாகத் தான் இருப்பர் போல. உயர்ந்த எண்ணம் எது என்ற வரையறுப்பதில் சிக்கல் உள்ளது. நான் முதல்வர் ஆக வேண்டும் என நினைத்தால் அது உயர்ந்த எண்ணம் இல்லை. அது சந்தர்ப்பம் பார்ப்பதுதான்.
-விழா ஒன்றில் நிதி அமைச்சர் அன்பழகன்
உங்கள் பேச்சு தத்துவம் போலிருந்தாலும் அது தத்துவம் அல்ல. இரண்டாம் இடத்தை தக்கவைத்துக் கொள்வதில் மட்டுமே அக்கறைக் காட்டும், மனதை செலுத்தும் அல்லது அதற்கு மட்டுமே தன்னை தயார்படுத்தி வைத்துக்கொண்டிருக்கும் மனிதர்களின் புலம்பல் போலதான் உள்ளது. முதல் இடம் எப்போதுமே இரண்டாவது இடத்திற்கு ஆசைப்படுபவர்களுக்கு கிடைக்கவே கிடைக்காது.

மது விலக்கு: பெரியார், அண்ணா வழியில் செல்ல வேண்டும்:
முதல்வர் கருணாநிதிக்கு ராமதாஸ் ஆலோசனை

செஞ்சி: கள்ளுக்கடைகளை எதிர்த்து, தன் தோட்டத்து தென்னை மரங்களை வெட்டிய பெரியாரின் வழியிலும், மது விலக்கு போராட்டத்திற்காக சிறை செல்வோம் என்ற அண்ணாவின் வழியிலும் தம்பி கருணாநிதி செல்லவேண்டும் என்று ராமதாஸ் கூறியுள்ளார்.

செஞ்சியில் நடந்த பா.ம.க. மகளிர் மது ஒழிப்பு மாநாட்டில் அவர் பேசுகையில்,

”தமிழகத்தில் இளைஞர்கள் முதல் முதியவர்கள் வரை குடிக்கும் பழக்கும் அதிகரித்துள்ளது. இன்னும் 5 ஆண்டுகளில் குடிக்காதவர்களே இல்லை என்ற அவல நிலை உருவாகும். சமுதாயம் அழிவை நோக்கி செல்வது வேதனையாக இருக்கிறது.

வருமானத்தை எதிர்பார்க்காமல் டாஸ்மாக் கடைகளை மூட வேண்டும். கடந்த 40 ஆண்டுகளாக தி.மு.க., அ.தி.மு.க. ஆட்சிகள் நடந்து வருகிறது.

இவர்களது வழிகாட்டியான அண்ணா, கடந்த 1968இல் முதல்வராக இருந்த காலகட்டத்தில் நடந்த அகில இந்திய பொது மதுவிலக்கு மாநாட்டில் பேசும்போது, ‘மது விலக்கு தோல்வியடைந்து விட்டதாக சிலர் கூறுகின்றனர். சமூக பொருளாதாரத்தை ஒப்பிட்டு பார்க்கும்போது அதற்கு பின்னால் தாய்மார்கள், குழந்தைகள் அழுகிற காட்சிதான் என் கண் முன் நிற்கிறது. நாட்டில் உள்ள பல்வேறு மாநிலங்களுக்கும் சென்று மது விலக்கு போராட்டம் நடத்துவோம். சட்டத்தை மீறுவோம். சிறை செல்வோம்’ என்றார்.

கள்ளுக்கடைகள் கூடாது என்று பெரியார் தனது தோட்டத்தில் இருந்து 500 தென்னை மரங்களை வெட்டி வீழ்த்தினார்.

நாகம்மை, பெரியாரின் தங்கை கண்ணம்மா ஆகியோரின் தலைமையில் மகளிர் போராட்டம் நடந்தது. 1971இல் மதுக்கடைகளை திறந்துவிட்டார்கள். இப்போது மூட வேண்டும் என்ற கோரிக்கை வலுத்துள்ளது. அண்ணாவின் தம்பி கருணாநிதி, நல்ல முடிவை அறிவிக்க வேண்டும்” என்றார்.